ANG PINAKAPAHINGA KO
pinakapahinga ko na'y pagtulâ
at pagsagot ng krosword at sudoku
ganyan ang buhay ng abang makatâ
pag pagod na'y magpahingang totoo
kaya madalas may tulâ sa gabi,
madaling araw, umaga, tanghali
paraan din iyan ng pagsisilbi
sa masa't ang dusa'y di manatili
kayraming paksang dapat ilarawan
dapat sabihin o ipaliwanag
tulad ng mga isyu ng lipunan
na tunay namang nakapangangarag
tula'y pantanggal ng sama ng loob
o pakiramdam sakaling mayroon
paksa ma'y saya, tuwa, galit, kutob
mahalaga, pagtula'y isang misyon
- gregoriovbituinjr.
10.20.2025
Walang komento:
Mag-post ng isang Komento