ANG MGA NALILIRIP
iniisip ko pa ring kumatha
ng nobelang tatatak sa madla
inspirasyon ang danas ng dukha
upang sa hirap ay makalaya
nagsasalimbayan ang nalirip
na paksang umaalon sa isip
pati mga isyung halukipkip
upang masa sa dusa'y masagip
bawat pagkatha'y di isusuko
kahit ang nadarama'y siphayo
pinangarap sana'y di gumuho
at ang asam na akda'y mabuo
nawa'y masimulan at matapos
ang nobela hinggil sa hikahos
wakasan na ang pambubusabos
ng sistemang sa dibdib umulos
- gregoriovbituinjr.
02.21.2025
Walang komento:
Mag-post ng isang Komento