nang bata pa ako'y / aking natutunan
ang isang kayganda / nating kasabihan:
"Yaong di lumingon / sa pinanggalingan,
di makararating / sa paroroonan."
anong kahulugan / ng tinurang ito
ng mga ninuno, / pamanang totoo
na bilin sa atin / ay magpakatao
lingunin ang sanhi / ng pagiging tao
isipin mong lagi / saan ka nagmula
kung galing sa hirap / ay magpakumbaba
makisamang husay / sa kapwa mo dukha
lalo't naranasan / ang pagdaralita
kung sakali namang / ikaw na'y yumaman
dahil sa sariling / sikap ng katawan
minsan, lingunin mo / yaong nakaraan
at baka mayroong / dapat kang tulungan
yaong nakalipas / ay ating lingunin
at pasalamatan / silang gabay natin
tulad ng kawayang / yumukod sa hangin
lalo't pupuntahan / ay ating narating
- gregoriovbituinjr.
11.03.2021
Walang komento:
Mag-post ng isang Komento