Pamasahe ng ubanin

PAMASAHE NG UBANIN

‎kapag nagbayad ako ng bente

‎imbes ang sukli ko ay siyete

‎susuklian ako ng nuwebe

‎dapat pamasahe ko ay trese

‎akala senyor na kayâ onse

- gregoriovbituinjr.

03.31.2026

* mapapanood ang munting bidyo sa kawing na:

https://www.facebook.com/share/v/1Ei5bLGCbZ/ 

Tulawit sa kababaihan

TULAWIT SA KABABAIHAN

‎

‎sina Maria Clara, Juli, at Sisa

‎ay imbento ni Rizal sa nobela,

‎Gabriela, Oriang, Liza, Lorena

‎babaeng tunay sa ating historya

‎

‎- gregoriovbituinjr.

‎03.31.2026

‎

‎* Gabriela Silang, Gregoria "Oriang" de Jesus, Liza Balando, Lorena Barros

* mapapanood ang munting bidyo sa kawing na: 

https://www.facebook.com/share/r/18jy7V6NcV/

Panonood ng 'Kababaihan ng Malolos' at 'History of the Underground'

PANONOOD NG 'KABABAIHAN NG MALOLOS' AT 'HISTORY OF THE UNDERGROUND'

Maikling sanaysay at tula ni Gregorio V. Bituin Jr.

Dalawa ang plano ko ng buong araw. Dumalo sa aktibidad na Kalbaryo ng Maralita ng Partido Lakas ng Masa (PLM). Ikalawa, manood ng mahahalagang dokumentaryong pangkasaysayan, ang 'Kababaihan ng Malolos' sa UP Film Center ng ika-11 ng umaga.

Ikawalo pa lang ng umaga uy umalis na ako ng Bahay upang daluhan ang unang aktibidad ng PLM sa tapat ng PCUP. Ma-trapik at nakarating ako sa PCUP bandang mag-iika-9 ng umaga. Wala sila. Baka nakaalis na. Sakay agad ako ng dyip puntang Quezon City Hall. Dumating ako ng Kalayaan ng ika-9:30. Nag-abang doon, wala pa sila sa tapat ng DHSUD, nag-almusal ng kanin at sitaw sa gilid na karinderya. Bumalik. Dinaanan ang DHSUD at NHA. Wala pa rin. Bandang ika-10:30 ay umalis na ako at naglakad patungong sakayan ng UP. Nakarating sa UP Film Center Videotheque ng 10:45. Tamang-tama.

Pinanood ko ang 'Kababaihan sa Malolos' na siyang alam kong nag-iisang palabas doon. Pinanood ko dahil nais kong mabatid pa ang hinggil sa kanila, bukod sa nilalaman ng liham ni Dr. Jose Rizal na pinamagatang "Sa Mga Kababaihan ng Malolos". Nasa isa't kalahating oras din ito.

Inisip kong abangan sa CHED ang Kalbaryo, subalit nakita kong may isa pang interesting na palabas ng alas-dos. Ang pamagat ay 'History of the Underground' ng ikalawa ng hapon. Kaya nagpasya akong panoorin iyon kaysa abangan ang Kalbaryo sa pagdaan nito sa CHED na di ko batid kung anong oras. Nag-aalangan akong pumunta. Dahil nga yaong naunang nakaiskedyul ay walang dumating.

Ikalawa kong pinanood ang "History of the Underground" kung saan ilan sa mga nakapanayam ay sina Joma Sison, Dodong Nemenzo, Princess Nemenzo, Ed Dela Torre, at marami pang iba, hinggil sa pagkakatayo ng isang rebolusyonaryong partido noong 1968. Dalawa't kalahating oras din ito. Pumasok ako ng alas-dos at nanood, at lumabas ng alas-singko, dahil matapos ang palabas ay nakipagtalakayan pa sa audience ang direktor na si Sari Dalena.

Napanood ko ang pagsisimula ng Sari Dalena Retrospective sa buong Marso, ang "Memoirs of a Forgotten War" at ang "Cinemartyrs". At itong huli kong dalawang napanood ay ito ngang "Kababaihan sa Malolos" at ang "History of the Underground".

kaysarap manood ng paksang kasaysayan

na marami'y di mo nabasa sa aklatan

o kung nabasa man, detalye'y kaliitan

kaya di mo manamnam at di nasarapan

ngunit sa dalawang nasabing pelikula

ay magkakainteres ka pagkat maganda

kaya mga ito'y sinadya ko talaga

upang masaksihan at ako'y matuto pa

03.30.2026

Sakaling mawalâ ang tulâ

SAKALING MAWALÂ ANG TULÂ

‎

‎darating din ang panahong mawawalâ ang tulâ

‎ng makatang taring na itinutulâ ang dukhâ

‎tumitindi ang nakaambang panganib ng digmâ

habang nadudungisan ang dangal ng maralitâ

‎

‎mga nalathalang tula'y tulay ko sa pangarap

‎na payapang bansa't mundo, dukha'y di naghihirap

‎na karapatang pantao't hustisya na'y malasap

‎ganyan pa ngayon ang makatang taring kung mangusap

‎

‎oo, pagkawala niring mga tula'y darating

‎kung ako'y mamatay na't mga tulâ ko'y sunugin

"subersibo", makapangyarihan ay sasabihin

"filibustero" ang tawag ng gobyerno sa akin

pag nawalâ ang tulâ, ang makata'y isinumpà

ng mga balakyot at kurakot na pinagpalà

at ang buong buhay kong pinaghirapang makathâ

hinggil sa manggagawa't dukha'y mababalewalâ

- gregoriovbituinjr.

03.30.2026

Malunggay dyus

MALUNGGAY DYUS

mga dahon at tangkay

ng biniling malunggay

ay inilaga natin

upang maging inumin

pampalakas daw naman

nitong pangangatawan

pag ininom mo ito

lulusog kang totoo

pamamaraang simple

inumin araw-gabi

blood sugar ay bababa

kolesterol, bababa

panlaban sa impeksyon

pati sa konstipasyon

pampaganda ng balat

sa malunggay, salamat

- gregoriovbituinjr.

03.29.2026

Sa dyip

SA DYIP

‎

‎kapag nagbayad ako ng bente

‎imbes ang sukli ko ay siyete

‎susuklian ako ng nuwebe

‎dapat pamasahe ko ay trese

‎akala senyor na kayâ onse

‎

‎buhok ko kasi'y kayraming uban

‎at akin na lang hinahayaan

‎kung ang pagtingin na nila'y ganyan

‎mukhâ na akong senyor kung masdan

‎may JR. man sa aking pangalan

‎

‎talagang kaybilis ng panahon

‎hirap man, matatag pa rin ngayon

‎di tulad ng palaka sa balon

‎kundi kalabaw, nakakaahon

‎

‎- gregoriovbituinjr.

‎03.29.2026

Narinig lang po

NARINIG LANG PO

‎

‎minsan, narinig kong isang kasama'y nagsalitâ:

‎"Bantayan n'yo si Greg, pagkat mga isyu ng dukhâ

‎at lipuna'y sinusuri't ginagawan ng tulâ

‎at madalas ay agad niyang inilalathalà."

‎

‎papuri ba iyon o birò kung tulâ ang pakay

‎ng inyong lingkod na karamihan kong tula'y tulay

‎sa masa, lalo't samutsari'y pinapaksang tunay

‎tulang produkto ng haraya't palagiang nilay

‎

‎hindi na lang ako nagsalitâ at nagkomento

‎dahil ako'y humahabi noon ng isang kwento

‎wala rin naman akong narinig na negatibo

‎kundi pagpaalala sa laging ginagawâ ko

‎

‎kayâ tangi kong masasabi: "maraming salamat!"

‎kahit tula'y nakabartolina sa tugma't sukat 

‎ay naririto pa ring patuloy sa pagsusulat

‎tula't kwento'y bahagi't paraan ng pagmumulat

‎

‎- gregoriovbituinjr.

‎03.29.2026

Awit sa kapayapaan

AWIT SA KAPAYAPAAN

Inawit noon ni John Lennon:

"All we are saying is give peace a chance."

Inaawit ko naman ngayon:

"Ang nais natin, kapayapaan!"

- gregoriovbituinjr.

03.29.2026

* mapapanood ang munting bidyo sa kawing na: 

ttps://www.facebook.com/share/v/16srMmsN5W/ 

Krisis sa klima at panawagang Wealth Tax

‎KRISIS SA KLIMA AT PANAWAGANG WEALTH TAX

‎

‎kaytinding epekto ng klima at polusyon

‎may mga bagyo, bahâ, init ng panahon

‎nawawasak ang kalikasan, may korapsyon

‎sa mga flood control projects, di biro iyon

‎

‎pag-unlad ba pag wasak na ang kalikasan

‎dahil sa mga coal plants at mga minahan

‎ang biglaang pagkasunog ng talahiban

‎apektado'y kalusugan ng mamamayan

‎

‎sobrang init, sobrang lamig, pabago-bago

‎ang klima, anong dapat gawin ng gobyerno?

‎ayuda ba'y sapat ipantulong sa tao?

‎pa'no kung sa kurakot napunta ang pondo 

‎

‎epekto sa kabuhayan, kaytinding gutom

‎may gagawin tayong makabuluhan ngayon

‎palagdaan sa bayan ang ating petisyon

‎ang "Asian People's Petition for Wealth Taxation"

‎

‎mga pondong dagdag, sa Wealth Tax dapat kunin

‎upang ipantulong sa mamamayan natin

‎sa nasalanta sa kalamidad sa atin

‎buwisan ang bilyonaryo ang ating hiling

‎

‎dapat nang buwisan ang mga mayayaman!

‎"Wealth tax, ngayon na!" ang sigaw ng sambayanan

‎sama-sama tayong petisyon ay lagdaan

‎wealth tax na! mga bilyonaryo na'y buwisan

‎

‎- gregoriovbituinjr.

‎03.28.2026

‎

‎* kinathâ at binigkas bilang ulat ng Group 1 (epekto sa nasalanta ng bagyo, bahâ, polusyon, atbp.) sa workshop at talakayan hinggil sa Wealth Tax

Ang LPG at ang Wealth Tax

ANG LPG AT ANG WEALTH TAX

‎

‎presyo ng LPG na'y sisirit

‎kada tangke, one thousand five hundred

‎mga mamamayang nagbuBUWIS

‎ay talaga ngang mabuBUWISit

‎

‎dagdag pahirap na sa pamilya

‎ang pagkain ba'y titipirin na

‎sa nangyayaring ito sa masa

‎ay di na sasapat ang ayuda

‎

‎dapat buwisan ang bilyonaryo

‎at di ang mga dukha't obrero

‎panawagan iyan sa gobyerno

‎"Wealth Tax, ngayon na!" sigaw ng tao

‎

‎- gregoriovbituinjr.

‎03.28.2026

‎

‎* litrato mulâ sa pahayagang Pang-Masa, Marso 28, 2026

‎* kinathâ at binigkas ang tulâ habang dumadalo sa talakayan sa Wealth Tax

Sapul ng editorial cartoon

‎SAPUL NG EDITORIAL CARTOON

‎

‎sapul ng editorial cartoon

‎ang pulso ng madlâ 

‎pati na pusâ ay tumugon

‎kaytalim ng diwà

‎

‎ngunit ating mauunawaan

‎ang kanyang trabaho

‎upang di mag-panic ang bayan

‎upang di gumulo

‎

‎subalit ramdam naman natin

‎yaong nangyayari 

‎kaytaas ng mga bilihin

‎sinong masisisi

‎

‎ngunit may patamà ang pusà

‎bansa'y paraiso

‎pag sila raw ay nagsalitâ

ito ba'y totoo?

‎

‎- gregoriovbituinjr.

‎03.28.2026

‎

‎* litrato mulâ sa pahayagang Bulgar, Marso 28, 2026

Kalbaryo at protesta ng maralita

KALBARYO AT PROTESTA NG MARALITA

nataon sa panlabintatlong Biyernes ng taon

ang Kalbaryo ng Maralita, isang aktibidad

na sama-sama ng iba't ibang organisasyon

naglakad hanggang sa aming marating ang Mendiola

prinotesta ang mandarambong sa kaban ng bayan

tinuligsa'y gobyernong nagtatakip sa kawatan

prinotesta ang pamamayagpag ng dinastiya

tinuligsa ang yumurak sa dignidad ng masa

prinotesta ang kalbaryo ng mga demolisyon

tinuligsa ang laksang bayarin sa relokasyon

prinotesta'y palpak na kalakaran sa pabahay

tinuligsa ang kawalang katarungan sa buhay

prinotesta'y imperyalismo't kanilang imperyo

tinuligsa dahil masa'y dinala sa impyerno

prinotesta ang mga panggigiyera ng U.S.

tinuligsa pati pagtaas ng presyo ng langis

kalbaryo'y dama ng masa, di lang ng maralitâ

kalbaryo rin ang mga kurakot na pinagpalà

kalbaryo ang giyerang nilunsad ng mga hangal

kalbaryong baka magdulo sa giyera mundiyal

- gregoriovbituinjr.

03.27.2026

* salamat sa mga kumuha ng litrato

DRAWER o REWARD?

DRAWER O REWARD?

‎

‎baligtaran pag binasa

‎yaong dalawang salitâ

‎wastong sagot ay DRAWER ba?

‎o REWARD kayâ ang tamâ?

‎

‎goal-setting word ba ang DRAWER?

‎o mas goal-setting ay REWARD?

‎kung gamit sa opis, DRAWER

‎kung nais maabot, REWARD

‎

‎larong Word Shatter sa selpon

‎ay sadyang nakawiwili

‎parang salita'y palindrome

‎y'ung pamagat nito, pwede

‎

‎salamat, may ganyang larô

‎na sa diwa'y ehersisyo

‎at sa pagod mo'y susugpô

‎larong magugustuhan mo

‎

‎- gregoriovbituinjr.

‎03.27.2026

Sa paglubog ng araw

‎SA PAGLUBOG NG ARAW

‎

‎sa paglubog ng araw, kami'y liwanag sa gabi

‎huwag ituring na malamlam na ilaw sa poste

‎kahit inuuban na, kami pa rin ay may silbi

‎upang labanan ang mga kurakot at salbahe

‎

‎matikas pa rin kami pag kumilos o gumalaw

‎mga panawagan ay kaya pa naming isigaw

matatag, kahit kain lang ay sampung pisong lugaw

‎nagsisilbi sa masa, maghapon man ay kaypanglaw

‎

‎mabuhay ang mga tulad kong tibak na may uban

‎pagpupugay sa lahat ng mandirigmang Spartan 

‎pagkilos nami'y di mapipigil ng katandaan

‎tungong pinapangarap na makataong lipunan

‎

‎araw na'y palubog, may uban na ang aming buhok

subalit umiiral pa rin ang sistemang bulok,

‎dinastiya, kurakot, mandarambong, trapong bugok

‎patuloy kaming kikilos upang sila'y ilugmok

‎

‎- gregoriovbituinjr.

‎03.26.2026

Limang pisong bagol

LIMANG PISONG BAGOL

‎

‎mulâ Cubao, lakad bago mag-Quezon City Hall

sa isang opis, tanging laman ng bulsa'y bagol

‎umabot na sa ganyan ang hirap kong nasapol

paano ba alpasan ang panahong kaysahol?

‎

‎ngunit ako'y patuloy pa ring naninindigan

‎na kahit ganito, ako'y tibak na Spartan

‎na di magigiba ng anumang karukhaan

‎ang kalooban kong pinatigas ng labanan

‎

‎anong gagawin ng loob na naghihimagsik

‎lalo na't tumututol sa giyerang mabagsik

‎bawat gunita't danas ay aking tinititik

‎ako'y di bibigay ibitin mang patiwarik

‎

‎limang pisong bagol man ang natira sa bulsa

‎ito'y mapapalago rin, ako'y umaasa

‎mandirigmang Spartan kaming lingkod ng masa

‎kumilos upang kamtin ang asam na hustisya

‎

‎- gregoriovbituinjr.

‎03.26.2026

May karapatan tayong lumaban

MAY KARAPATAN TAYONG LUMABAN

‎

‎may karapatan tayong lumaban

‎kahit na dama natin ang takot

‎gaano man ang kapangyarihan

‎ng mga buktot at mapang-imbot

‎

‎mandarambong sa pondo ng bayan

‎ay dapat lang nating mapanagot

‎at silang kurakot at gahaman

‎sa sala'y di dapat makalusot

‎

‎sino bang sa kanila'y papalag

‎kundi ang masang nakikibaka

‎mga trapong kayraming paglabag

‎ay dapat patalsikin ng masa

‎

‎tara na, magsikilos na tayo

‎at karapatan nati'y igiit

‎managot ang kurakot sa pondo

‎ng bayan, dapat silang ipiit

‎

‎- gregoriovbituinjr.

‎03.25.2026

‎

‎* litrato mulâ sa larong Word Connect sa selpon

Pag-aalala

‎PAG-AALALA

‎

‎dahil sa giyera sa Gitnang Silangan

‎presyo ng bilihin ay nangagtaasan

‎mag-aalala ka't baka kapusin ka

‎bigas, pamasahe, karne, at iba pa

‎

di mag-aalala‎ sa ganito'y sino?

lalo ‎kung giyera'y titinding totoo

‎na ang tinutungo'y giyera mundiyal

‎dahil sa pinunong tilà baga hangal

‎

‎nanggiyera riyan, nanggiyera roon

‎bagong kaayusa'y inihihimaton

‎ang kalagayan nga'y sadyang lumalalâ

‎paano pa kayâ iyan mapahupà

‎

‎nag-aalala ka sa maraming bagay

‎malayo man doon, apektadong tunay

‎

‎- gregoriovbituinjr.

‎03.25.2026

‎

‎* litrato mulâ sa headline ng pahayagang Pang-Masa, Marso 19, 2026

Planetang Biyo, ipinangalan sa Pinay na gurô

PLANETANG BIYO, IPINANGALAN SA PINAY NA GURÔ

‎

‎ang Florian main-belt asteroid 13241 Biyo 

‎na nadiskubre ng LINEAR sa Lincoln Lab's ETS

‎ay ipinangalan kay Guro Dr. Josette Biyo

‎ng Philippine Science High School System (PSHSS)

‎

‎karangalan nang ipangalan sa isang planeta

‎ang gurong mahusay, biyolohista, siyentista

‎ganito'y pambihirang pagkakataon talaga

‎dangal ng lahi, sadyang dapat pagpugayan siya

‎

‎siya'y ipinanganak sa Janiuay, Iloilo

‎at nakatapos sa UP Visayas sa Miag-ao

‎ng Bachelor's Degree in Biological Sciences

‎tinanggap pa'y maraming award sa larang ng agham

‎

‎kay Dr. Josette Biyo, taasnoong pagpupugay!

‎ang iyong mga naiambag ay malaking bagay

‎para sa bansa't estudyanteng tinuruang tunay

‎salamat po, Dr. Biyo, mabuhay ka! MABUHAY!

‎

‎- gregoriovbituinjr.

‎03.25.2026

‎

‎* ulat mulâ sa pahayagang Pilipino Star Ngayon, Pebrero 10, 2026, p. 5

* dagdag na datos mula sa Wikipedia

Awit sa laki sa layaw

AWIT SA LAKI SA LAYAW

‎

‎ayon kay Mike Hanopol

‎"laki sa layaw, laki sa layaw, Jeproks"

‎sabi naman ni Balagtas

‎"Ang laki sa layaw, karaniwa'y hubad

‎sa bait at muni't sa hatol ay salat"

‎

‎- gregoriovbituinjr.

‎03.24.2026

* mapapanood ang munting bidyo sa kawing na:

https://www.facebook.com/share/v/1KG9TztLid/ 

Pebrero at Marso

‎PEBRERO AT MARSO

‎

‎sa pagsulpot ng Pebrero

‎nabubuhay na lang ako

‎sa pagbebenta ng libro

‎gutom na kung wala ito

‎

‎ngayong Marso, gayon pa rin

‎kakilala'y aalukin

‎upang aking libro'y bilhin

‎nang may pambiling pagkain

‎

‎bagong pagkakakitaan

‎na ang kinakailangan

‎habang tuloy ang tulaan

‎anupaman ang pagitan

‎

‎kayhirap nang nag-iisa

‎bagamat kasama'y masa

‎walang magpayong maganda

‎sa tulad kong biyudo na

‎

‎gayon din kayâ sa Abril

‎na búhay na'y sinisikil

‎kaypayat na't walang bilbil

‎karapata'y nasusupil

‎

‎kapalaran ma'y kay-ilap

‎ang solo'y di nililingap

‎sana ako'y makahanap

‎ng pagkakitaang ganap

‎

‎- gregoriovbituinjr.

‎03.23.2026

Sa lugar-lagdaan

 

‎SA LUGAR-LAGDAAN

‎

‎balang araw ay uupo rin ako

‎sa lugar-lagdaan ng mga libro

‎naming sinulat, nobelang totoo

‎o kaya'y ng tula't maikling kwento

‎

‎hindi naman masamâ ang mangarap

‎na tilà pinaghehele sa ulap

‎lalo na't búhay ko'y aandap-andap

‎pagkat walang sinumang lumilingap

‎

‎sana'y mabigyan ng pagkakataon

‎ang kagaya kong makatang may layon

‎upang kapwa ko dukha'y magsibangon

‎laban sa sistemang bulok na iyon

‎

‎patuloy lamang ako sa pagkathâ

‎ng kwento't tulâ sa obrero't dukhâ

‎sa lugar-lagdaan uupong sadyâ

‎bilang isang natatanging may-akdâ

‎

‎- gregoriovbituinjr.

‎03.23.2026

‎

‎* litrato kuha sa Philippine Book Festival 2026, sa Megatrade Hall ng SM Megamall, Marso 14, 2026

Awit sa problemado

  

AWIT SA PROBLEMADO

‎

‎inawit noon ni Ka Freddie:

"‎tawanan mo ang 'yong problema"

‎sabi ko, huwag lang tawanan

‎suriin, buong kalagayan

‎lutasin mo ang 'yong problema

‎

‎- gregoriovbituinjr.

‎03.23.2026

* mapapanood ang munting bidyo sa kawing na: 

https://www.facebook.com/share/v/189BEkaMe8/ 

Muthalà

  

MUTHALÀ

‎

‎nagninilay akong nakatutungà

‎pinagmamasdan ang mga muthalà

‎habang aking kinakatha sa diwà

‎ang luhang di masabi niring dilà

‎

‎pawang unos sa búhay ang dumating

‎nadarama pa rin ang paninimdim

‎pag madaling araw ay nagigising

‎pag umaga na'y walang naglalambing

‎

‎ninilay sa katanghaliang tapat

‎habang yaong muthala'y kalat-kalat

‎badyang walang unos sa hinaharap

‎tila baga langit ang nangungusap

‎

‎maipagtatanggol ang karapatan

‎makata'y nasa rali sa lansangan

‎may muthalà sa sawing kapalaran 

‎bawat sulirani'y may kalutasan 

‎

‎- gregoriovbituinjr.

‎03.23.2026

‎

‎* muthalà - kalat-kalat na maninipis na ulap, mula sa Diksiyonaryong Adarna, p.612

Mula sa radio: Remember Someone Today

  

‎MULA SA RADYO: REMEMBER SOMEONE TODAY

‎

‎kaysarap pakinggan ng musika

‎ng pagsintang may inaalala

‎sa radyo lalo na't sasabihin:

‎"Remember someone today" na bilin

‎

‎sino pa ba ang nagugunitâ

‎ng taring na biyudong makatâ

‎kundi ang kanyang itinatangi

‎at sanhi ng kanyang mga hikbi

‎

‎kaygagandang awit ng pag-ibig

‎animo pagsinta'y di malupig

‎ng anumang panganib at hirap

‎ng loob na madalas malasap

‎

‎salamat sa gayong mga tugtog

‎na tila sa sinta'y inihandog

‎

‎- gregoriovbituinjr.

‎03.22.2026

‎

‎* mula sa istasyong 96.3 Easy Rock

* mapapanood ang munting bidyo sa kawing na: https://www.facebook.com/share/v/1BGVkrqqrx/ 

Pagbabakasakali ngunit sulit

  

PAGBABAKASAKALI NGUNIT SULIT

‎

‎kayrami kong natutunan sa Printbiz

‎para sa akin ay sulit na sulit

‎nais kong natutunan ko'y magamit

‎sana dito'y di ako magmintis

‎

‎di sapat ang aking napagbentahan

‎ng mumunti kong libro ng tulaan

‎dapat may dagdag na pagkakitaan

‎sa Printbiz ay nagbakasakali lang

‎

‎ngunit sulit pagkat ako'y natuto

‎upang ang buhay ay muling tumakbo

‎pasasalamat ang tanging alay ko

‎pagkat may pagkakakitaang bago

‎

‎maraming salamat at pagpupugay

‎sa Printbiz, mga mentor ay kayhusay

‎

‎- gregoriovbituinjr.

‎03.22.2026

Halina't magtulawitan

      

HALINA'T MAGTULAWITAN

‎

‎ang makatang may luha't pag-asa

‎nangangarap maging manganganta

‎kaya tinitipa sa gitara

‎ang tulang ngayon ay tulawit na

‎

‎- gregoriovbituinjr.

‎03.21.2026

‎

‎* tulawit - pinagsamang tulâ at awit o tulang inaawit

* mapapanood ang munting bidyo sa kawing na:

https://www.facebook.com/share/v/1CWS4aj567/ 

Palakingkingan

PALAKINGKINGAN

‎

‎kung ang hinliliit ay kalingkingan

‎hinlalato pala'y palakingkingan

habang may daliring palasinsingan

‎

‎may salitang madalas di magamit

ang palakingkingan ay parang pilit

palasinsingan sa kasal malimit

‎

‎mabuti na rin at nabatid iyon

‎na para sa mga makata'y misyon

‎at para sa tugmaang nilalayon

‎

‎anumang tawag, daliri'y may silbi

‎tulad ng hintuturo't hinlalaki

‎pagtipa sa selpon, kompyuter, busy

‎

‎di man pamilyar ang ilang salitâ

‎mabuti't nabatid ang bago't lumà

‎bago sa akin, batid ng matandâ

‎

‎- gregoriovbituinjr.

‎03.21.2026 (World Poetry Day)

‎

‎* mulâ sa Diksiyonaryong Adarna, pahina 674

Nilay sa digmâ

NILAY SA DIGMÂ

‎

‎nananakop na ang imperyalistang bansâ

upang langis at yaman ng iba'y agawin

‎para sa kanilang pansariling interes

‎nag-iimbento ng rason upang mandigmâ

‎

‎una nilang inatake ang Venezuela

‎nagbantang isusunod ang Cuba at Greenland

‎biglang-bigla'y inatake nila ang Iran

‎at ibang alyadong bansa'y niyayakag pa

‎

‎armas pandigma ang pangunahing produkto

‎na pag walang digmaan ay walang bibili

‎imperyalista'y may silbi lang sa sarili

‎subalit panggulo pag nandigmâ na ito

‎

‎wakasan ang gerang walang silbi sa atin

‎kundi kapritso lang ng makapangyarihan

‎tuunan ang pag-unlad at kapayapaan

‎anumang tinanim ang siyang aanihin

‎

‎- gregoriovbituinjr.

‎03.21.2026

‎

‎* mga litrato mulâ sa pahayagang Pilipino Star Ngayon, Marso 2, 2026, tampok na balità (headline) at pahina 2

Ngayong World Poetry Day 2026

NGAYONG WORLD POETRY DAY 2026

‎

‎tumatagaktak man / ang pawis sa noo

‎nilalakad ko ma'y / kilo-kilometro

‎patuloy ang nilay / sa kalsada't kwarto

‎kathâ ng makata'y / regalo sa mundo

‎

‎idolo ko sina / Batute't Balagtas

‎mga kathâ nila / sa diwa'y kumatas

‎Sa Dakong Silangan, / bansang Pilipinas

‎Florante at Laura'y / binasa't nawatas

‎

‎nariyan din sina / Percy Bysshe Shelley,

‎‎John Keats, Arthur Rimbaud, / Neruda, Tagore

‎Cirilo Bautista, / Natsume Sōseki,

‎Glen Sales, Teofilo / Cid, Romalyn Ante

‎Bucaneg, Almario, / Gemino H. Abad,

‎Lumbera, Collantes, / Dimalanta, Gullas,

‎Joel Malabanan, / Danilo C. Diaz,

‎Emmanuel Lacaba, / at Maningning Miclat

‎

‎papel ko man lagi'y / makatâ ng masa

‎pagkat tumutulâ / sa rali't kalsada

‎sa tugma't sukat ma'y / nakabartolina

‎pinag-iigihan / ang tulâ tuwina

‎

‎sa mga higante / sa larang ng tulâ

‎ako'y nagpupugay / sa inyong nagawâ 

‎ngayong Daigdigang / Araw ng Pagtulâ

‎mabuhay! Mabuhay / ang bawat makatâ!

‎

‎- gregoriovbituinjr.

‎03.21.2026

Munglô, muól at muóy

MUNGLÔ, MUÓL, AT MUÓY

‎

‎ano kaya sa Ingles ang munglô?

‎sa medisina, ang kahulugan

‎ay paninilaw bunga ng sakit

‎tulad ng Gilbert syndrome, cirrhosis

‎

‎sa Zoolohiya ay natukoy

‎kung ano yaong muól at muóy

‎ang muól ay usang nalagasan

‎ng sungay sa sakit, katandaan

‎

‎kung ang muóy ay babaeng kúto

‎kuyumad ay maliit na kúto

‎at ang lisâ ay itlog ng kúto

‎ano naman ang lalaking kutó?

‎

‎tatlong salitang bago o lumà

‎bago sa akin, lumang salitâ

‎na nasaliksik ko nang di sadyâ

‎na mabuting gamitin sa tulâ

‎

‎- gregoriovbituinjr.

‎03.21.2026 (World Poetry Day)

‎

* litrato mula sa Diksiyonaryong Adarna, p.610

Hubad kong isip

‎HUBAD KONG ISIP

‎

‎animo'y makatâ ang lumikhâ

‎ng krosword na aking nasagutan

‎"Hubad kong isip", nakatutuwâ

‎tingni ang Labing-isa Pahalang

‎

‎kahulugan pala'y inosente

‎o batang di nasagpang ng leyon

‎at di kinakanti ng salbahe

‎ako sa sarili'y napabulong:

‎

‎"katalamitam ko sa pag-idlip

‎ang naroong magandang diwatà

‎di mawari ng hubad kong isip

‎sa harap niya ako'y tulalâ"

‎

‎lumikha ng krosword ba'y tulad ko?

‎makatang walâ sa toreng garing?

‎sinalita'y kaygandang totoo

‎ang hubad kong isip ay nagising

‎

‎- gregoriovbituinjr.

‎03.20.2026

‎

‎* palaisipan mulâ sa pahayagang Pang-Masa, Enero 6, 2026, p.7

Awit sa karapatan

AWIT SA KARAPATAN

‎

‎UDHR - Universal Declaration of Human Rights

‎

‎ayon sa UDHR, Artikulo Uno

‎pantay, may dignidad at karapatan tayo

‎sinuman, pulubi, donya, lahat ng tao

‎karapatang pantao'y dapat irespeto

‎

‎- gregoriovbituinjr.

‎03.20.2026

* mapapanood ang munting bidyo sa kawing na: 

https://web.facebook.com/share/v/1EWibYTgJx/ 

Sa ika-12 Black Friday Protest ng 2026

SA IKA-12 BLACK FRIDAY PROTEST NG 2026

‎

‎patuloy lang tayo tuwing Biyernes

‎sa paglulunsad ng Black Friday Protest

‎saan man maganap, itim ang bihis

‎sa pangangalampag, di magmimintis

‎

‎wakasan na iyang mga digmaang

‎para sa pansariling kapakanan

‎ng mga nanggigiyerang kawatan

‎sugo ng kapitalismong gahaman

‎

‎dinidigma ang tahimik na bansâ

‎upang langis nito'y agawing sadyâ

‎ng imperyalistang Kano't kuhilà

‎na talaga namang kasumpâ-sumpâ

‎

‎patuloy pa rin ang pagpapanagot

‎sa mga mandarambong at kurakot

‎sa kaban ng bayan, ang mga buktot

‎ay ikulong, di dapat makalusot

‎

‎- gregoriovbituinjr.

‎03.20.2026

Paglalakad sa red carpet

PAGLALAKAD SA RED CARPET

‎pangkaraniwang araw man iyon
‎ay pambihirang pagkakataon
‎ang maglakad sa red carpet doon
‎sa isang talakayan o forum
‎
‎tila ba ako'y personalidad
‎pagkat sa red carpet ay naglakad
‎bagamat di ko iyon hinangad
‎subalit sa bungad na'y tumambad
‎
‎sa labas lang iyon ng bulwagan
‎pagpasok ay tiyak daraanan
‎kaya sa selpon ay bnidyuhan
‎na red carpet ang nilalakaran
‎
‎forum ng karapatang pantao
‎ang doon nga'y dinadaluhan ko
‎minsan ay matuwa ang lolo mo
‎sa bungad man ay red carpet ito
‎
‎- gregoriovbituinjr.
‎03.20.2026
‎

* kinunan ang bidyo sa pagdalo sa isang maghapong talakayan at palihan hinggil sa karapatang pantao, Marso 19, 2026

* mapapanood ang bidyo sa kawing na: https://www.facebook.com/share/r/1CGCgu4Qd5/ 

Ingat: Babala o Bilin?

INGAT: BABALA O BILIN?

‎

‎‎aba'y mali yaong tanong

‎na "Babala sa lilisan"

tatlumpu't walo pahalang

‎sa isang palaisipan

‎

‎para bagang nananakot

‎o may himig pagbabantâ

‎gayon ba ang kahulugan

‎pag sinabihan mong "Ingat"?

‎

‎kung ako ang tagagawâ

‎ng krosword na tulad niyon

‎mas mabuti pang isulat

‎doon: "Bilin sa lilisan"

‎

‎pag sinabi mong "Babala"

‎may mangyayaring masamâ

‎di gaya ng "Bilin", siya'y

‎pinapayuhan mong sadyâ

‎

‎may saya't kurot sa pusò

‎pag sinabihan kang "Ingat"

‎nagsabi'y mabuting tao

‎asam ay kaligtasan mo

‎

‎- gregoriovbituinjr.

‎03.20.2026

‎

‎* krosword mulâ sa pahayagang Pang-Masa, Marso 12, 2026, p.7