LUNGAD
Labingtatlo Pahalang: Pagsuka ng sanggol
anim na titik, at ang lumabas na sagot:
LUNGAD, salitang ngayon ko lamang nasapol
bago lang sa akin ang katagang sumulpot
unang araw ng Abril, salita'y bumungad
madaling araw nang krosword ay masagutan
dyaryo'y kahapon pa, ngayon lamang nalantad
sa krosword ang bagong salitang kakaiba
sa wikang Ingles, infant reflux pala ito
iba sa suka, sapagkat kusang lalabas
sa bibig yaong gatas matapos sumuso
na karaniwan lang, ayon sa mga pantas
dagdag na salita itong magagamit din
sa pagkatha ng kwento, tula, at sanaysay
tila baga nalasap ay bagong pagkain
kaya bokabularyo'y nagiging makulay
- gregoriovbituinjr.
04.01.2025
* palaisipan mula sa pahayagang Bulgar, Marso 31, 2025, pahina 11
Walang komento:
Mag-post ng isang Komento