UMAGA
sumalubong ang umagang maaliwalas
habang nagising sa ibong huni'y kaylakas
sa iwing diwa'y may kung anong nawawatas
na sa anyo ng mukha'y iyong mababakas
kinain ang bahaw na kagabi niluto
upang tanggalin ang gutom at pagkahapo
isinulat kaagad upang di maglaho
ang mga nasa isip ng buong pagsuyo
sa guniguni'y may lumalambi-lambitin
kaagad uminom ng tubig nang mahirin
tila may kung anong mga alalahanin
na dapat suriin, pag-isipan, lutasin
umiikot ang buhay habang gumagawa
nagkakayod-kalabaw habang naghahanda
sa bukas ng pamilya habang tumatanda
kayganda ng umaga habang kumakatha
- gregoriovbituinjr.
04.12.2023
Walang komento:
Mag-post ng isang Komento