Ulap na hugis-puso
civil wedding sa Tanay
umuwi ng Kaylaway
nang sa langit lumitaw
ang pusong anong linaw
ito'y pagpupugay ba
sa amin ng tadhana
di ba kataka-taka
nagsapuso'y ulap pa
ang pangyayaring iyon
nga ba'y pagkakataon
ulap ay nagkatipon
upang bumati noon
pagsinta'y patagalin
hagkan siya't siilin
ng halik at mahalin
sumpaan ay tungkulin
sa anumang labanan
ay wala ngang iwanan
ito'y isang sumpaan
na hanggang kamatayan
ulap na hugis-puso
salamat sa pagsuyo
magkasundo ang payo
pag-ibig ang pangako
- gregoriovbituinjr.
Walang komento:
Mag-post ng isang Komento