Pagninilay sa kawalan
higit sa isang buwan na ang kwarantinang ito
lampaso, linis, laba, luto, lalo't lockdown dito
nagbubutingting lang sa bahay, solusyon ba'y ano?
mas malabo pa sa sabaw ng pusit ang ganito
gayunman, sa mga frontliners, maraming salamat
sa inyong pagtulong upang virus ay di kumalat
sana lunas sa virus ay matagpuan nang sukat
para sa kinabukasan, kalusugan ng lahat
dahil sa kwarantina, tayo'y sa bahay maglagi
upang di mahawa, sumunod kahit panandali
di tayo habang lockdown sa bahay mananatili
magugutom ang pamilya't magbabakasakali
titigan minsan ang mga bituin sa karimlan
at pagnilayan mo ang hakbang sa kinabukasan
tiyak na mayroon ka ring nais maliwanagan
habang matamang nakatitig doon sa kawalan
- gregbituinjr.
04.23.2020
Walang komento:
Mag-post ng isang Komento