Ginisang sardinas na may malunggay

GINISANG SARDINAS NA MAY MALUNGGAY

may dalawang sanga ng malunggay

at may isang lata ng sardinas

tiyak na namang ako'y didighay

muling gaganahan at lalakas

may kamatis, bawang at sibuyas

nilagay ang kawali sa kalan

sabaw ay unab o hugas-bigas

kalan ay akin nang sinindihan

nilagyan ng kaunting mantikà

sibuyas at bawang na'y ginisa

pati kamatis at sardinas ngâ

unab, malunggay, pinaghalo na

tara, katoto, saluhan ako

tiyak, masasarapan ka rito

- gregoriovbituinjr.

10.26.2025

Sa kagubatan ng kalunsuran

SA KAGUBATAN NG KURAKUTAN

minsan, daga'y nagtanong sa leyon:

"Ano pong suliranin n'yo ngayon

baka lang po ako'y makatulong

buti't niligtas n'yo ako noon

sa buwaya, di ako nilamon."

anang leyon sa dagang lagalag:

"Kagubatan natin ay madawag

proyekto ng tao rito'y hungkag

parang flood control, di ka panatag

pondo'y ninakaw, batas nilabag."

"Anong panglaw ng kinabukasan

ng bayang tigib ng kurakutan

animo'y tinik sa kagubatan

iyang korapsyon sa kalunsuran

umuusok hanggang kalangitan"

"Parang ahas sa gubat na ito

kayraming buwaya sa Senado

kayraming buwitre sa Kongreso

nabundat ang dinastiya't trapo

kawawa ang karaniwang tao."

napatango na lamang ang dagâ

ngayon ay kanya nang naunawà

kung bakit kayraming mga dukhâ

sa lungsod niyang tinitingalâ

pasya n'ya'y manatili sa lunggâ

- gregoriovbituinjr.

10.26.2025

Tanong: Magnanakaw; Sagot: Senador?

TANONG: MAGNANAKAW; SAGOT: SENADOR?

Tanong - Apat Pababa: Magnanakaw

pitong titik ang KAWATAN, SENADOR

anong sagot kayang tamang ilagay?

di naman pitong titik ang KONTRAKTOR

sa tindi ng garapalan sa badyet

pinatindi ng isyung ghost flood control

sagot dito'y maaaring masakit

ngunit bayan ay baka di tututol

magagalit ba ang mga senador?

sa aking sagot sa palaisipan?

o ang ituturo nila'y kontraktor?

sadyang kaysakit ng katotohanang:

di climate change ang dahilan ng bahâ

kundi kabang bayan ay kinurakot

ng mga trapong binoto ng madlâ

mga kawatang dapat lang managot

sa pondo ng flood control, sila'y paldo

Senador Kawatan, bundat na bundat

pati mga buwaya sa Kongreso

dapat mandarambong makulong lahat

- gregoriovbituinjr.

10.25.2025

* krosword mula sa Abante Tonite, Oktubre 25, 2025, p.7

Itlog at okra sa inin-in

ITLOG AT OKRA SA ININ-IN

bago tuluyang main-in ang kanin

isinapaw ko ang apat na okra

at naglagay ng puwang sa inin-in

upang doon itlog ay lutuin pa

ang kawali'y di na kinailangan

upang mapagprituhan nitong itlog

okra'y in-in na ang pinaglagaan

sa hapunan ay kaysarap na handog

anong laking tipid pa sa hugasin

isapaw lang, aba'y ayos na ito

sa buhay na payak, may uulamin

pag sikmura'y kumalam na totoo

mga katoto, tarang maghapunan

ulam sana'y inyong pagpasensyahan

- gregoriovbituinjr.

10.25.2025

Ikulong na 'yang mga kurakot!

IKULONG NA 'YANG MGA KURAKOT!

sigaw ng masa'y di malilimot:

"Ikulong na 'yang mga kurakot!"

na kaban ng bayan ang hinuthot

ng buwaya't buwitreng balakyot

sa masa'y dapat silang matakot

galit na ang masa sa kurakot

katarungan sana'y di maudlot

kurakot sana'y di makalusot

kaylaking sala ng mga buktot

na lingkod bayang dapat managot

hustisya'y kanilang binaluktot

dapat talagang may mapanagot

TONGresista't senaTONG na buktot

silang mga naglagay ng ipot

sa ulo ng bayan na binalot

ng lagim nilang katakot-takot

kahayupang sa dibdib kaykirot

na gawa ng trapong mapag-imbot

paano ba natin malalagot

ang sistemang bulok at baluktot

parusahan ang lahat ng sangkot

ikulong silang mga balakyot

parusahan ang lahat ng buktot

IKULONG NA 'YANG MGA KURAKOT!

- gregoriovbituinjr.

10.25.2025

Thermopylae - sa tarangkahan ng apoy

THERMOPYLAE - SA TARANGKAHAN NG APOY

noon, nakipagdigmaan kami

sa tarangkahan ng apoy, sabi

nila'y iyon daw ang Thermopylae

doon buhay nami'y nakaugnay

kabilang ako sa tatlong daang

mandirigmang tawag ay Spartan

sa matinding labanan bumagsak

upang pasibulin ang pinitak

sa lupaing ayaw na isukò

sa kaaway, dumanak ma'y dugô

lumaban at hinawan ang landas

tungò sa isang malayang bukas

kami ang mandirigma ng apoy

muling lalaban kaysa managhoy

para sa kapakanan ng lahi

para sa kagalingan ng uri

sa makabago mang Thermopylae

Eurytus akong lalabang tunay

upang palayain itong bayan

sa mapagsamantalang iilan

- gregoriovbituinjr.

10.25.2025

* mapa ng Thermopylae mula sa google

Namili sa palengke

NAMILI SA PALENGKE

kaunti lang ang pinamili

ko sa kalapit na palengke

kahit gaano pa ka-busy

ay namalengke ang makatâ

payak lang ang inihahandâ

mas mahalaga'y ang pagkathâ

kaya meron nang ilulutò

nariya'y santumpok na tuyô

sibuyas, kamatis, nagtahô

sa daan, sa init kumanlong

tatlong taling okra, may talong

na santumpok, at sampung itlog

pakiramdam ko'y anong saya

at mamaya'y magluluto na

matapos maligo't maglaba

- gregoriovbituinjr.

10.25.2025

Pandesal, salabat at malunggay tea

PANDESAL, SALABAT AT MALUNGGAY TEA

payak lamang ang aking inalmusal

malunggay tea, salabat at pandesal

sa iwing resistensya'y pampatagal

sa takbuhan, di ka agad hihingal

ngunit mamaya, mahabang lakaran

tungo sa mahalagang dadaluhan

dapat may pampalakas ng katawan

at pampatibay ng puso't isipan

anupa't kaysarap magmuni-muni

pag nag-almusal, nagiging maliksi

ang kilos, susulat pang araw-gabi

ng akdang sa diwa'y di maiwaksi

tarang mag-almusal, mga katoto

pagpasensyahan lang kung konti ito

- gregoriovbituinjr.

10.25.2025

Tulâ na lang ang mayroon ako

TULÂ NA LANG ANG MAYROON AKO

tulâ na lang ang mayroon ako

hayaan n'yong iambag ko ito

para sa maralita't obrero

para sa buti ng bansa't mundo

huwag sanang hayaang mawalâ

ang aking kakayahang kumathâ

ang pagiging makatâ ng dukhâ

ang pag-ibig ko sa mutya't tulâ

ang mayroon ako'y tulâ na lang

hayaang masa ang makinabang

na parang mga tanim sa parang

na parang tanghalian sa dulang

tulâ mang sa plakard isinulat

upang maraming masa'y mamulat

taos akong nagpapasalamat

sa mga tumangkilik, sa lahat

- gregoriovbituinjr.

10.24.2025

* litrato kuha sa Edsa Shrine, 10.24.2025

Ngayong Black Friday Protest

NGAYONG BLACK FRIDAY PROTEST

salamat sa lahat ng mga nakiisa

sa pagkilos kahit ako lamang mag-isa

may nakausap nga ako't ako'y ginisa

ngunit di natinag sa kanyang pang-iisa

ganyan kaming mga aktibistang Spartan

minsan, solong diskarte lang ang may katawan

mahalaga, misyon ay isakatuparan

tulad ng Black Friday Protest kanina lamang

mabuhay kayong lahat, O, mga kasama

magpatuloy pa tayo sa pakikibaka

at ating baguhin ang bulok na sistema

nang kamtin ng bayan ang asam na hustisya

- gregoriovbituinjr.

10.24.2025

* litrato kuha sa harap ng NHA, 10.24.2025

Ang plakard na patulâ

ANG PLAKARD NA PATULÂ

patula ang plakard ng makatâ

na sa rali bibitbiting sadyâ

pagsingil sa korap at kuhilà

narito't basahin ang talatà:

Oktubre'y matatapos nang ganap

Wala pang nakukulong na korap

Trapong kurakot at mapagpanggap

Sa bayan ay talagang pahirap

- gregorivbituinjr.

10.24.2025

* talata - kahulugan din ay saknong pag tulâ

Inumin ng tibak na Spartan

INUMIN NG TIBAK NA SPARTAN

tsaang bawang, luya at malunggay

ang kadalasan kong tinatagay

layon kong katawan ay tumibay

kalamnan ay palakasing tunay

lalo't araw-gabing nagninilay

nagsusulat ng kwento't sanaysay

titingala sa punong malabay

sa buhawi'y di nagpapatangay

kailangan sa mahabang lakbay

ay mga tuhod na matitibay

uminom ng katamtamang tagay

hanggang isipan ay mapalagay

pag pakiramdam mo'y nananamlay

inom agad ng tsaang malunggay

luya't bawang na nakabubuhay

aba'y agad sisigla kang tunay

- gregoriovbituinjr.

10.23.2025

Payabat at Arô

PAYABAT AT ARÔ

sa Anim Pababâ: Pangingitlog ng isdâ

at sa Labing-isa Pahalang: Munting bilog

ay, di ko batid ang gayong mga salitâ

tila baga kaylalim ng pananagalog

sinagot agad ang Pahalang at Pababâ 

hanggang lumabas na kung anong tamang tugon

PAYABAT pala ang pangingitlog ng isdâ

at ARÔ ang maliit na bilog na iyon

dagdag kaalaman sa wikang Filipino

na dapat kong itaguyod bilang makatâ

na nais kong ibahagi kahit kanino

upang mapaunlad pa ang sariling wikà

maraming salamat sa PAYABAT at ARÔ

mga katagang kay-ilap na tila gintô

- gregoriovbituinjr.

10.23.2025

* krosword mulâ sa pahayagang Pilipino Star Ngayon, Oktubre 23, 2025, p 10

* Payabat in English: Definition of the Tagalog word payabat 

https://www.tagalog.com/dictionary/payabat 

Sa bayan ng mga kurakot

SA BAYAN NG MGA KURAKOT

nakilala ang bayan ng mga kurakot

dahil sa buwaya't buwitreng nanunulot

ng proyektong flood control na katakot-takot

ang bilyones na perang kanilang nahuthot

mga bata'y di makapasok sa eskwela

dahil dadaanan nila'y bahâ talaga

bahâ paglabas pa lang ng tahanan nila

bahâ pagpasok pa sa trabaho ni ama

ano nang nangyari sa proyektong flood control

na sana'y di binabahâ ang mga pipol

di sa flood control, sa pansarili ginugol

kabang bayan ay dinambong ng mga ulol

ang kakapal ng mukhâ ng mga kurakot

nagpayaman sa pwesto, kaban ay hinuthot

sa bilyones na ninakaw sila'y managot

dapat silang makulong at di makalusot

nagbabahâ pa rin sa maraming probinsya

at kalunsuran dahil sa ginawa nila

proyektong bilyon-bilyon ay naging bulâ na

sinagpang ng walang kabusugan talaga

napakinggan ng bayan ang mga kontrakTONG

sa harap ng TONGresista't mga senaTONG

inamin nilang sa badyet ay may insersyon

sigaw ng bayan: lahat ng sangkot, IKULONG!

- gregoriovbituinjr.

10.23.2025

* litrato kuha sa Luneta, Setyembre 21, 2025

Lakbay-nilay

LAKBAY-NILAY

maglalakad ba o sasakay

sa malayo-layo ring lakbay

aba'y di na sila nasanay

na ehersisyo'y aking pakay

subalit kapag sasakay ka

may barya ka ba sa umaga?

o buô pa ang iyong pera

kung di masuklian, pa'no na?

destinasyo'y nakasasabik

pagkat may ugnay sa panitik

lalo't literatura'y hitik

sa gunam, libog, libag, barik

tumulâ, tumukâ, tumudlâ

kwaderno't pluma'y laging handâ

daanan man tayo ng sigwâ

ay makasusulat ng tulâ

- gregoriovbituinjr.

10.23.2025

Minimum Wage sa mambabatas, Living Wage sa manggagawa

MINIMUM WAGE SA MAMBABATAS, LIVING WAGE SA MANGGAGAWA

saludo kina Eli San Fernando at Renee Co

sa panawagang minimum wage na sa solon sweldo

tunay silang lingkod bayan ng karaniwang tao

sa kanila'y nagpupugay akong taaskamao!

kayang mabuhay sa minimum wage ng mambabatas

kahit sa kongreso't senado, bangko'y binubutas

ngunit magsisipag kayâ ang trapong talipandas?

na gawin ay batas na para sa lahat ay patas?

kayang mabuhay sa minimum wage ng kongresista

tongpats o insersyon sa badyet ba'y mawawala na?

o kailangan talagang baguhin ang sistema?

nang mawala na ang pulitikal na dinastiya!

ngunit di sapat ang minimum wage sa manggagawà

lalo't buhayin ang mundo ang tungkuling dakilà

silang gulugod ng ekonomya ng bawat bansâ

ngunit sila pang manggagawà ang nagdaralitâ

kayâ sigaw ng manggagawà ay SAHOD ITAAS!

ay di pa dahil wala sa minimum wage ang sahod

kundi mas mataas sa minimum wage ay maabot

kayâ LIVING WAGE ang sinisigaw nilang madalas

iyang LIVING WAGE nga'y nakasulat sa Konstitusyon

mawalâ ang political dynasty pa'y naroon

subalit di naman naisabatas hanggang ngayon

ay, iyan pa kayang minimum wage para sa solon?

- gregoriovbituinjr.

10.22.2025

Salamat, Bianca, sa iyong pag-alala

SALAMAT, BIANCA, SA IYONG PAG-ALALA

salamat, Bianca Umali, sa concern mo

doon sa NAIA sa laksang pasahero 

na nakita mong nakaupo lang sa sahig

gayong sementong iyon ay sadyang kaylamig

anya, sana'y may pansamantalang upuan

para sa nanay, lola't batang kababayan

tagos sa buto ko ang kanyang pakiusap

na sana namamahala'y gawin nang ganap

nakapagtatakang di iyon naiisip

ng namamahala, di ba nila nalirip

kung saan uupo ang mga bibiyahe

sana sila'y di manatiling bulag, bingi

silya't gamit ay pansamantalang inalis

upang konstruksyon daw ng NAIA'y bumilis

subalit nasa sahig, naghihintay ng flight

ang mga pasahero't ganyan ang naging plight

salamat, Bianca, sa iyong malasakit

at karapatang pantao'y iyong giniit

pakiusap na sa gitna ng pagbabago

dapat di profit ang tingin sa pasahero

- gregoriovbituinjr.

10.22.2025

* ulat mula sa pahayagang Pang-Masa at Pilipino Star Ngayon, Oktubre 21, 2025

Inuming malunggay

INUMING MALUNGGAY

sampung pisong malunggay

ang binili kong tunay

sa palengkeng malapit

barya man ay maliit

nilagay ko sa baso

at binantuan ito

ng mainit na tubig

na panlaban sa lamig

layunin ko'y lumakas

ang kalamna't tumigas

bisig na matipunô

at sakit ay maglahò

sa malunggay, salamat

dama'y di na mabigat

ang loob ko'y gumaan

pati puso't isipan

- gregoriovbituinjr.

10.22.2025

Aga, iga, ugâ

AGA, IGA, UGÂ

ilang lindol na ba ang nagdaan?

ilang lungsod na ba ang binahâ?

ilang senaTONG na ang kawatan?

ilang flood control ang di nagawâ?

dapat kay-aga nating mabatid

anumang sakunang paparating

anumang mangyari sa paligid

dahil may instrumentong magaling

kailan ba baha'y maiiga?

kung maayos na ba ang flood control?

pag-uga'y dapat paghandaan na

ay, dapat makaiwas sa lindol

tayo'y marapat magtulong-tulong

pag matinding pag-uga'y dumatal

paghandaan saan magkakanlong

paghahanda'y sa diwa ikintal

- gregoriovbituinjr.

10.21.2025

Sa hagupit ng kalikasan at pulitiko

SA HAGUPIT NG KALIKASAN AT PULITIKO

tumitindi ang hagupit ng kalikasan

at pulitikong binoto ngunit kawatan

sa baha't lindol, mag-ingat ang taumbayan

trapong kawatan na'y dakpin at parusahan

sa kalikasan, masa'y may adaptasyon pa

at mitigasyon ngunit ingat din talaga

maghanda sa mangyayari't mananalasa

lindol at pagbaha'y paghandaan ng masa

ang kinupitang ghost flood control na proyekto

buwis ng bayan ang kinawat na totoo

aba'y sabay-sabay nilang dinedelubyo

ang bansang Pilipinas, aray ko! aray ko!

di lamang basta milyon, kundi bilyon-bilyon

ang nakaw ng mga buwayang mandarambong

ng mga TONGtraktor, TONGresista't senaTONG

kawatang dapat nang managot at makulong!

ay, sadyang kaylupit ng kanilang hagupit

dapat lang ang bayan ay talagang magalit

ibagsak silang sa kabang bayan nangupit

at tiyakin ding di sila makapupuslit

- gregoriovbituinjr.

10.21.2025